Um okkum

UM VEVSTOVUNA MÝRIFÍPUNA

Tað var Olevina Joensen, sum miðskeiðisí farnu øld setti Vevstovuna Mýrifípuna á stovn. Í 1993 bleiv virkið so umskipað til smápartafelag.

Vit húsast í einum kjallara í Stoffalág í Tórshavn. Har standa báðir maskinvevarnir og tær 9 hosumaskinurnar, umframt aðrar maskinur, ið eru knýttar at framleiðsluni.
Goymslan er aðrastaðni í býnum.

VEVSTOVAN

Báðir vevarnir eru týskir. Annar, ein Schönherr, er frá umleið 1893, og bleiv keyptur til Føroyar í 1970. Hann er av tí gamla slagnum við rullum, at stýra skøftunum og við stórum tungum skjútlum.

Hin er ein Dornier, sum bleiv keyptur brúktur úr Danmark í 1997. Hann er meira modernaður við holkortum at stýra skøft og litir við og við tengrum í staðin fyri skjútlum (rapier-loom).

Harafturat eru spolimaskinur at spola vanligar spolar upp, umframt at gera spolar til skjútlarnar við.

HOSUVIRKIÐ

4 av hosumaskinunum og annað tilhoyr keyptu vit á sumri í 2004 frá Tekstilvirkinum í Kaldbak. Tríggjar maskinur keyptu vit úr Noregi á vári 2006, eina keyptu vit úr Svøríki í 2009, og tann síðsta er keypt á vári 2017, eisini úr Svøríki.

Allar maskinurnar eru enskar, av slagnum Bentley Komet. Tað eru íalt 6 maskinur, sum binda ullintar hosur, ein sum kann binda froté og tvær til at binda fínari hosur við. Umframt sjálvar bindimaskinurnar hava vit aðrar maskinur, sum eru knýttar at framleiðsluni.