Vevstova

Í lítlu vevstovu okkara er lív í, tá vit t.d. veva skjúrtatoy, plaid og kotavadmal. Vit hava tveir vevar – báðir eru týskir. Annar, ein Schönherr, er frá uml. 1893 og bleiv keyptur til Føroya fyrst í 1970-unum. Hann er av tí gamla slagnum við rullum at stýra skøftunum og við stórum tungum skjútlum (shuttle-loom). Saman við hesum vevinum varð eisini eitt Schönherr renniborð keypt, sum vit gera renningina við. So vit arbeiða dagliga á yvir 100 ára gamlari útgerð – sum má sigast at vera framúr góðska.

Hin vevurin er ein Dornier frá 1970, sum bleiv keyptur brúktur úr Danmark í 1997. Hann er meira modernaður við holkortum at stýra skøft og litir við og við tengrum í staðin fyri skjútlum (rapier-loom).
Harafturat eru spolimaskinur at spola vanligar spolar upp, umframt at gera spolar til skjútlarnar við.

Fjálg og vøkur ullint plaid úr nappaðum Snældutógvi. Natúrlitir og tíðarleyst snið, sum hóskar til flestu heim. Plaidini verða vovin á umleið 130 ára gamla Schönherr vevinum og síðani verða tey gjørd til við hond.

Vit byrja við at gera eina renning, tá ið vit skulu veva skjúrtatoy. Í eini renning kunnu vera tilsamans 1.237.950 metrar av garni! Ikki smávegis. Síðani verður renningin løgd uppá, sett í Dornier vevin – og so er klárt at veva.

Av og á hava vit loyst heilt serligar uppgávur, sum vit hava fingið áheitan um at gera. Hetta eru stórar, spennandi og avbjóðandi uppgávur, til dømis hava vit vovið gólvteppið til Fríðrikskirkjuna, møblaklæði til kirkjuna í Hoyvík og gardinur og seingjarteppi til Norðurlandahúsið.